ಮುನೀರ್ vs ಎಮ್.ಕೆ ಫ್ಯಾಮಿಲಿ – ನಡುವಲ್ಲೊಬ್ಬ ಹಕೀಂ..!! ಇದು ಮುಲ್ಕಿ ಮರ್ಡರ್‌ ಮಿಸ್ಟರಿ!

ಮುಲ್ಕಿ ಅನ್ನೋದು ತಾನಾಯಿತು, ತನ್ನ ಪಾಡಾಯಿತು ಅನ್ನೋ ಹಾಗೆ ರಾಷ್ಟ್ರೀಯ ಹೆದ್ದಾರಿಗೆ ಚಾಚಿಕೊಂಡಿರುವ ನಗರ. ಒಂದರ್ಥದಲ್ಲಿ ಮಂಗಳೂರು ಹಾಗೂ ಉಡುಪಿಗೆ ಮುಲ್ಕಿ ಅನ್ನೋದು ಮಧ್ಯಪ್ರದೇಶ ಇದ್ದಂತೆ. 2006 ರಲ್ಲಿ ಬಿಜೆಪಿ ಯುವ ಮುಖಂಡ ಸುಖಾನಂದ ಶೆಟ್ಟಿ ಹತ್ಯೆ ನಂತರ ನಡೆದ ಗಲಭೆಗೆ ಮುಲ್ಕಿ ಪರಿಸರ ತುತ್ತಾಗಿದ್ದು ಬಿಟ್ರೆ, ಇಂದಿಗೂ ಅಂತಹ ಹೇಳಿಕೊಳ್ಳುವಷ್ಟರ ಮಟ್ಟಿಗೆ ಗದ್ದಲ, ಗಲಭೆಗಳಿಗೆ ಮುಲ್ಕಿ ಆಸ್ಪದನೇ ಕೊಟ್ಟಿಲ್ಲ. ಆದರೆ ಕಳೆದ ಶುಕ್ರವಾರ (ಜೂನ್ 5, 2020) ಮುಲ್ಕಿ ನಗರ ಒಂದು ಆಘಾತಕಾರಿ ಘಟನೆಗೆ ಸಾಕ್ಷಿಯಾಯಿತು. ಅರೆ ಅದೇನಾಗ್ತಿದೆ ಅಂತಾ ತಿಳ್ಕೊಳ್ಳೋ ಮುನ್ನವೇ “ಮುಲ್ಕಿಯಲ್ಲೊಂದು ಮರ್ಡರ್ ಆಗಿದ್ಯಂತೆ” ಅನ್ನೋ ಸುದ್ದಿ ಬಾಯಿಂದ ಬಾಯಿಗೆ ಹರಡಿದೆ. ಜಾಲತಾಣ ತುಂಬೆಲ್ಲಾ ಪಸರಿಸಿದೆ. ಹಾಗೆ ಗೊತ್ತಾಗುತ್ತಲೇ ಮುಲ್ಕಿ ಪರಿಸರದಾದ್ಯಂತ “ಮುನೀರ್ ಅಳಿಯನ ಹತ್ಯೆ ನಡೆದಿದೆ” ಅನ್ನೋದು ಗೊತ್ತಾಗಿದೆ. ಈ ಮುನೀರ್ ಮುಲ್ಕಿಯ ಮಟ್ಟಿಗೆ ಉದ್ಯಮಿ ಅಂತಾ ಗುರುತಿಸಿಕೊಂಡರೂ, ಒಳ್ಳೆಯವರು ಯಾರೂ ಇವನ ಸಹವಾಸಕ್ಕೆ ಹೋಗಲಾರರು.. ಕಾರಣ, ಅವನ ದಂಧೆಗಳೇ ಅಂತಹದ್ದು.. ಈ ಹಿಂದೆ ಕೆಲವು ಕೇಸುಗಳು ಇವರ ಮೇಲೆ ಜಡಿದಿದ್ದವು. ಬಡ್ಡಿ ವ್ಯವಹಾರವೇ ಈತನ ಬ್ಯುಸಿನೆಸ್ ಆಗಿದೆ.

ಆದರೆ ಮುಲ್ಕಿಯಲ್ಲಿ ನಡೆದ ದಾಳಿ ಸಂದರ್ಭ ಹತ್ಯೆಯಾಗಿದ್ದು ಮಾತ್ರ ಮುನೀರ್ ಅಳಿಯ ಅಬ್ದುಲ್ ಲತೀಫ್.. 36ರ ಹರೆಯದ ಲತೀಫ್ ಮೂಡಬಿದ್ರಿಯಲ್ಲಿ ವಾಸಿಸುತ್ತಿದ್ದು, ಪುಟ್ಟ ಮಗುವೊಂದಿದೆ ಎನ್ನಲಾಗಿದೆ. ಜ್ಯುವೆಲ್ಲರಿ ಮಳಿಗೆ ಮಾಲಕನಾಗಿರುವ ಅಬ್ದುಲ್ ಲತೀಫ್ ಅವರ ಪತ್ನಿ (ಮುನೀರ್ ಪುತ್ರಿ) ವಕೀಲೆ ಆಗಿದ್ದಾರೆ. ಅಬ್ದುಲ್ ಲತೀಫ್ ಉತ್ತಮ ಸ್ವಭಾವ, ನಡತೆ ಹಾಗೂ ಸಾಮಾಜಿಕ ಚಟುವಟಿಕೆಯಲ್ಲಿ ತೊಡಗಿಸಿಕೊಂಡಿದ್ದೇ ಇಂದು ಕರಾವಳಿಯ ಮುಸ್ಲಿಮರು ಈ ಹತ್ಯೆ ವಿರುದ್ಧ ತೀವ್ರ ಆಕ್ರೋಶಿತರಾಗಿದ್ದಾರೆ..

ಜೂನ್ 5 ರಂದು ನಡೆದಿದ್ದೇನು…???

ಇನ್ನೇನು ಲಾಕ್ಡೌನ್ ನಿಂದ ಸಡಿಲಿಕೆ ಆಗುತ್ತಲೇ ಮುಲ್ಕಿ ನಗರವು ಸಹಜ ಸ್ಥಿತಿಯತ್ತ ಬಂದಿದೆ. ಜೂನ್ 5 ರ ಶುಕ್ರವಾರ ಮಧ್ಯಾಹ್ನ ದಾಟುತ್ತಲೇ ಕಾರಿನಲ್ಲಿ ಹೊರಟಿದ್ದ ಮುನೀರ್ ಮತ್ತು ಆತನ ಮಗ ಇಯಾಝ್ ಹಾಗೂ ಅಳಿಯ ಅಬ್ದುಲ್ ಲತೀಫ್ ಹೊರಟಿದ್ದ ಕಾರನ್ನ ಹೈವೇ ಎಂಟ್ರಿಯಾಗುತ್ತಲೇ ಒಂಬತ್ತು ಜನರ ತಂಡ ತಡೆ ಹಿಡಿದಿದೆ. ಮುನೀರ್ ಮತ್ತು ಆತನ ಮಗನಿಗೆ ಚಾಕು, ಕಲ್ಲಿನಿಂದ ಇರಿದಿದೆ. ಇಷ್ಟಾಗುತ್ತಲೇ ಮುನೀರ್ ಅಳಿಯ ಅಬ್ದುಲ್ ಲತೀಫ್ ಮಧ್ಯಪ್ರವೇಶಿಸಿದ್ದಾರೆ. ತಂಡವನ್ನ ತಡೆದು ನಿಲ್ಲಿಸುವ ಪ್ರಯತ್ನ ಮಾಡಿದ್ದಾರೆ. ಆದರೆ ದುಷ್ಕರ್ಮಿಗಳ ತಂಡ ದಾಳಿ ಹೆಚ್ಚಿಸುತ್ತಲೇ ಓಡಿ ಪ್ರಾಣ ರಕ್ಷಿಸೋ ಪ್ರಯತ್ನ ಮಾಡಿದ್ದಾರೆ. ಆದರೆ ಅದಾಗಲೇ ಹಸಿದ ತೋಳದಂತಾಗಿದ್ದ ಪಾಪಿಗಳು ಅವರನ್ನ ಅಟ್ಟಾಡಿಸುತ್ತಲೇ ಓಡಿದ್ದಾರೆ. HDFC BANK ಬಾಗಿಲ ಬಳಿಯೇ ಅಡ್ಡ ಹಾಕಿದ ತಂಡ ಕಲ್ಲು, ದೊಣ್ಣೆ ಹಾಗೂ ಚಾಕುವಿನಿಂದ ಮನಸ್ಸೋ ಇಚ್ಛೆ ಇರಿದು ಹಾಕಿದೆ. ಆ ನಂತರ ಲತೀಫ್ ನೆಲಕ್ಕೆ ಬೀಳುತ್ತಿದ್ದಂತೆ ತಂಡ ಅಲ್ಲಿಂದ ಬಿಂದಾಸ್ ಆಗಿಯೇ ಗಾಡಿ ಏರಿ ಹೊರಟು ಹೋಗಿದೆ.

ಇತ್ತ ರಕ್ತದ ಮಡುವಿನಲ್ಲಿ ನೋವಿನಿಂದ ಚೀರುತ್ತಲೇ ಇದ್ದ ಲತೀಫ್ ಸಹಾಯಕ್ಕೆ ಸುಮಾರು ಹತ್ತು ನಿಮಿಷಗಳ ಕಾಲ ಯಾವೊಬ್ಬ ಮುಲ್ಕಿಯ ಪ್ರಜ್ಞಾವಂತ ಬಾರದೇ ಇರೋದು ದುರಾದೃಷ್ಟವೇ ಸರಿ. ಕೊನೆಗೂ ಒಸರಾಡುತ್ತಿದ್ದ ಅಬ್ದುಲ್ ಲತೀಫ್ ಇಹಲೋಕದ ಜೀವನಕ್ಕೆ ವಿದಾಯ ಹೇಳಿದ್ದಾರೆ. ಈ ಎಲ್ಲಾ ದೃಶ್ಯಗಳು ಬ್ಯಾಂಕ್ ಸಿಸಿಟಿವಿಯಲ್ಲಿ ಸ್ಪಷ್ಟವಾಗಿ ದಾಖಲಾಗಿದೆ.

ಮುನೀರ್ vs MK ಫ್ಯಾಮಿಲಿ- ನಡುವಲ್ಲೊಬ್ಬ ಹಕೀಂ.!.!!!

ಅಸಲಿಗೆ ಈ ಘಟನೆಗೊಂದು ಕ್ಷುಲ್ಲಕ ಕಾರಣ ಎದ್ದು ಕಾಣುತ್ತಿದೆ. ಜೊತೆಗೆ ಮುಲ್ಕಿ ಕಾರ್ನಾಡಿನ ಎರಡು ಕುಟುಂಬಗಳ ಪ್ರತಿಷ್ಠೆಯ ಆಟವೂ ಕಾಣುತ್ತಿದೆ. ಕೊರೋನಾ ಲಾಕ್ ಡೌನ್ ಆರಂಭವಾಗುತ್ತಲೇ ಹಲವು ಮಂದಿ ಹಲವಾರು ರೀತಿಯಲ್ಲಿ ಬಡ ಮಂದಿಗೆ ಸಹಾಯ ನೀಡಿದ್ದಾರೆ. ಅಂತೆಯೇ ಕಾರ್ನಾಡ್ ನ ದರ್ಗಾ ರಸ್ತೆಯಲ್ಲಿ ಉದ್ಯಮಿ ಮುನೀರ್ ಮತ್ತು ಆತನ ಆಪ್ತರು ಸೇರಿಕೊಂಡು ಕಿಟ್ ವಿತರಿಸುತ್ತಿದ್ದರು ಎನ್ನಲಾಗಿದೆ. ಆ ರೀತಿ ವಿತರಿಸಬೇಕಾದರೆ ಮುನೀರ್ ಕಾರು ರಸ್ತೆಗೆ ಅಡ್ಡಲಾಗಿದ್ದು, ಅಂದು ಆಟೋ ರಿಕ್ಷಾ ತೆಗೆದುಕೊಂಡು ಅದೇ ಸಮಯಕ್ಕೆ ಬಂದ MK ಫ್ಯಾಮಿಲಿಯ ವ್ಯಕ್ತಿಯೊಬ್ಬರು ತಗಾದೆ ತೆಗೆದಿದ್ದಾರೆ. ಇದರಿಂದ ಅಂದು ಎರಡೂ ತಂಡಗಳ ನಡುವೆ ಜಟಾಪಟಿ ನಡೆದಿತ್ತು. ಮೊದಲೇ ಕಾರ್ನಾಡ್ ದರ್ಗಾ ರಸ್ತೆಯಲ್ಲಿ MK ಫ್ಯಾಮಿಲಿ ಅಂದ್ರೆ ಅವರಿಗಿರೋ ಗತ್ತು ಗೈರತ್ತೇ ಬೇರೆ. ಆದರೆ ಈ ಮುನೀರ್’ನಷ್ಟು ಆ MK ಫ್ಯಾಮಿಲಿ ಹೆಸರು ಕೆಡಿಸಿಕೊಂಡಿದ್ದಿಲ್ಲ. ದರ್ಗಾ ರಸ್ತೆ ತುಂಬಾ MK ಫ್ಯಾಮಿಲಿಗೆ ಸಂಬಂಧಪಟ್ಟ ಹಲವು ಮನೆಗಳಿವೆ. ಅವರ ಸಹೋದರ ಸಂಬಂಧಿಗಳೆಲ್ಲ ಅಲ್ಲೇ ಮನೆ ಮಾಡಿಕೊಂಡಿದ್ದಾರೆ. ಇದರಿಂದಾಗಿ ಅಂದು ಗಲಾಟೆ ಆಗುತ್ತಲೇ MK ಫ್ಯಾಮಿಲಿಯ ಹುಡುಗನೊಬ್ಬ ಸ್ಕ್ರೂ ಡ್ರೈವರ್’ನಿಂದ ಮುನೀರ್’ಗೆ ಇರಿದಿದ್ದಾನೆ. ಇದು ಆವತ್ತೇ ಮುಲ್ಕಿ ಪೊಲೀಸ್ ಠಾಣೆಗೂ ಹೋಗಿತ್ತು. ಅಲ್ಲಿ ರಾಜಿ ಪಂಚಾಯತಿಕೆ ನಡೆದು ಎಲ್ಲವೂ ಸರಿ ಹೋಗಿತ್ತು ಅನ್ನೋದಾಗಿ ಊರವರೆಲ್ಲ ಅಂದ್ಕೊಂಡಿದ್ದರು. ಆದರೆ ಎರಡೂವರೆ ತಿಂಗಳ ಕಾಲ ಹೊಗೆಯಾಡುತ್ತಿದ್ದ ದ್ವೇಷಕ್ಕೆ ಮೊನ್ನೆ ಮಹೂರ್ತವಿಟ್ಟವರೇ ಅಬ್ದುಲ್ ಲತೀಫ್ ಹತ್ಯೆ ಮೂಲಕ ಮುಲ್ಕಿಯಲ್ಲೊಂದು ಎರಡು ಕುಟುಂಬಗಳ ನಡುವಿನ ದ್ವೇಷದ ವಾತಾವರಣಕ್ಕೆ ಮುನ್ನುಡಿ ಬರೆದೇ ಬಿಟ್ಟಿದ್ದಾರೆ.

ಇನ್ನು ಹತ್ಯೆ ನಡೆಸಿರೋರಲ್ಲಿ ಒಂಬತ್ತು ಜನರ ಹೆಸರಿದೆ. ಅದರಲ್ಲಿ ಲೀಡಿಂಗ್ ಅಲ್ಲಿ ಕಾಣಿಸಿಕೊಂಡಿದ್ದೇ ಯೂತ್ ಕಾಂಗ್ರೆಸ್ ಮುಖಂಡ ಹಕೀಂ ಕಾರ್ನಾಡ್ ಹೆಸರು. ಅಸಲಿಗೆ ಈತ ಇದೀಗ ಭೂಗತನಾಗಿದ್ದಾನೆ ಅನ್ನೋ ಮಾತು ಕೇಳಿ ಬರತೊಡಗಿದೆ. ಇಂತಹವರಿಗೂ ಕಾಂಗ್ರೆಸ್ ಪಕ್ಷ ಕಳೆದ ಬಾರಿ ಟಿಕೆಟ್ ಕೊಟ್ಟು ಕೌನ್ಸಿಲರ್ ಮಾಡಿಸಿತ್ತು ಅನ್ನೋದೆ ಅಚ್ಚರಿ. ಊರಲ್ಲಿ ಒಳ್ಳೆ ಹೆಸ್ರು ಹೊಂದಿಲ್ಲದಿದ್ದರೂ, ಕಾಂಗ್ರೆಸ್ ಯುವ ನಾಯಕ ಮಿಥುನ್ ರೈ ಆಪ್ತನೆನ್ನುವಂತೆ ಗುರುತಿಸಿಕೊಂಡವನೀತ. ಜೊತೆಗೆ MK ಫ್ಯಾಮಿಲಿಯ ಹುಡುಗ, ಲತೀಫ್ ಹತ್ಯೆಯಲ್ಲಿ ಈಗಾಗಲೇ ಬಂಧಿತನಾದ ರಾಝಿಂ ಜೊತೆಗೂ ಹೆಚ್ಚು ‘ಕ್ಲೋಸ್’ ಆಗಿದ್ದ ಅನ್ನೋದಾಗಿ ಮೂಲಗಳು ತಿಳಿಸಿವೆ.

ಹೀಗೆ ಆಗಿರೋ ಘಟನೆ ಹಕೀಂ ಕಿವಿಗೂ ಬಿದ್ದಿದೆ. ಮೊದಲೇ ಕಾರ್ನಾಡಿನ ಮಸೀದಿಯ ಸಮಿತಿಯೊಂದರ ಅಧ್ಯಕ್ಷ ಪಟ್ಟದ ವಿಚಾರದಲ್ಲಿ ಮುನೀರ್ ಗೂ, ಈ ಹಕೀಂ ಗೂ ಅಷ್ಟಕ್ಕಷ್ಟೇ.. ಮೊದಲೇ ಹೇಳಿದ ಹಾಗೆ ಊರ ಸಜ್ಜನರಲ್ಲಿ ಕೇಳಿದ್ರೂ ಇವರಿಬ್ಬರ ಬಗ್ಗೆ ಅಷ್ಟಾಗಿ ಉತ್ತಮ ಅಭಿಪ್ರಾಯವಿಲ್ಲ. ಹೀಗೆ ಹಕೀಂ ತಾನೊಬ್ಬ ಜನಪ್ರತಿನಿಧಿ ಅನ್ನೋದನ್ನ ಮರೆತು ಇದರಲ್ಲಿ ಪಾಲ್ಗೊಂಡಿದ್ದಾನೆ ಅಂತ ಮುನೀರ್ ಆ್ಯಂಡ್ ಫ್ಯಾಮಿಲಿ ಆರೋಪಿಸಿದೆ. ಆದರೆ ಹತ್ಯೆ ಸಂದರ್ಭ ಮಾತ್ರ ಹಕೀಂ ಎಲ್ಲೂ ನೇರವಾಗಿ ಗುರುತಿಸಿಕೊಂಡಿಲ್ಲ. ಆದ್ದರಿಂದ ಹತ್ಯೆ ಹಿಂದೆ ಈತನ ನಿಜವಾದ ಪಾತ್ರವೇನು ಅನ್ನೋದು ಪೊಲೀಸರೇ ಉತ್ತರಿಸಬೇಕಿದೆ.

ದೀಪಕ್‌ ರಾವ್‌ ಹತ್ಯೆ ನೆನಪಿಸಿದ ಲತೀಫ್‌ ಮರ್ಡರ್…!!!

ಹೌದು, ಇಂತಹ ಹತ್ಯೆ ಕಂಡಾಗ ಕರಾವಳಿ ಜನತೆಗೆ ನೆನಪಾದದ್ದೇ ಅಮಾಯಕ ದೀಪಕ್‌ ರಾವ್. ಅಲ್ಲೂ ಹತ್ಯೆಗೆ ಕಾರಣವಾಗಿದ್ದು ಬರೇ ಕ್ಷುಲ್ಲಕ ಕಾರಣವೊಂದು ಮಾತ್ರ. ಸುರತ್ಕಲ್‌ ಠಾಣಾ ವ್ಯಾಪ್ತಿಯ ಕಾಟಿಪಳ್ಳದಲ್ಲಿ 2018 ರ ಜನವರಿ ತಿಂಗಳ ಮೊದಲ ವಾರದಲ್ಲಿಯೇ ನಡೆದಿದ್ದ ಈ ಹತ್ಯೆ ಹಿಂದೆಯೂ ಕೇವಲ ಬಂಟಿಂಗ್ಸ್‌ ಕಟ್ಟುವ ಸಮಯದಲ್ಲಿ ದೀಪಕ್‌ ವೀಡಿಯೋ ಚಿತ್ರೀಕರಿಸಿದ್ದ ಅನ್ನೋದಷ್ಟೇ ಸಾಕಿತ್ತು. ಗಾಂಜಾದ ಅಮಲೇರಿಸಿಕೊಂಡಿದ್ದ ಯುವಕರ ತಂಡ ತಿಂಗಳ ನಂತರ ಕಾದು ದೀಪಕ್ ನನ್ನು ಕೊಂದು ಹಾಕಿತ್ತು. ಅದಾಗ ಆ ಘಟನೆ ಕೋಮು ದ್ವೇಷಕ್ಕೂ ಕಾರಣವಾಗಿ, ಅಮಾಯಕ ಅಬ್ದುಲ್‌ ಬಶೀರ್‌ ಹತ್ಯೆಗೂ ಮಂಗಳೂರು ಸಾಕ್ಷಿಯಾಗಿತ್ತು. ಆದರೆ ಅಂದು ಈ ಗಾಂಜಾ ಮಸಲತ್ತಿನ ಬಗ್ಗೆ ಯಾರೂ ತಲೆಗೆಡಿಸಿಕೊಂಡಿಲ್ಲ. ಇದೀಗ ಮುಲ್ಕಿಯಲ್ಲಿ ನಡೆದ ಲತೀಫ್‌ ಹತ್ಯೆಯಲ್ಲೂ ಮತ್ತದೇ ಎರಡು ಪ್ರತಿಷ್ಟಿತ ಕುಟುಂಬಗಳ ನಡುವಿನ ಕಲಹದಲ್ಲಿ ಒಂದಿಷ್ಟು ಪುಂಡು ಗಾಂಜಾ ಹುಡುಗರು ಕಂಡಿರೋದು ಗೊತ್ತಾಗಿದೆ. ನಿಂತುಕೊಳ್ಳಲು ಸೊಂಟದಲ್ಲಿ ಸರಿಯಾಗಿ ಶಕ್ತಿಯೇ ಇಲ್ಲದ ಈ ಹುಡುಗರಿಗೆಲ್ಲ ಸುರತ್ಕಲ್‌, ಮುಲ್ಕಿ, ಬಜ್ಪೆ ವ್ಯಾಪ್ತಿಗಳಲ್ಲಿ ಬಲ ತುಂಬಿರೋದು ಗಾಂಜಾದ ಕಿಕ್‌ ಅಷ್ಟೇ. ಆದರೆ ನಗರ ಪೊಲೀಸರು ಕೇವಲ ಮಂಗಳೂರು ನಗರಕ್ಕಷ್ಟೇ ಸೀಮಿತರಾಗಿ ಗಾಂಜಾ ವಿರುದ್ಧ ಕಾರ್ಯಾಚರಣೆ ಎಸಗುತ್ತಿರೋದ್ರಿಂದಲೇ ದೀಪಕ್‌, ಬಶೀರ್‌, ಲತೀಫ್‌ ರಂತಹ ಅಮಾಯಕರ ಹತ್ಯೆ ನಡುಬೀದಿಗಳಲ್ಲಿ ಜನಸಾಮಾನ್ಯರ ನಡುವೆಯೇ ನಡೆದು ಹೋಗುತ್ತಿದೆ.

ಮುಲ್ಕಿ ಪೊಲೀಸರ ವೈಫಲ್ಯ ತಂದಿಟ್ಟ ಆತಂಕ…!!!

ಎರಡೂವರೆ ತಿಂಗಳ ಹಿಂದೆ ನಡೆದಿದ್ದ MK ಫ್ಯಾಮಿಲಿ ಹಾಗೂ ಮುನೀರ್‌ ನಡುವಿನ ಜಗಳ ಪೊಲೀಸ್‌ ಠಾಣೆ ಮೆಟ್ಟಿಲೇರಿತ್ತಾದರೂ ಅಂದೇ ಮುಲ್ಕಿ ಪೊಲೀಸರು ಕ್ರಮಕೈಗೊಳ್ಳುತ್ತಿದ್ದರೆ ಹೆಚ್ಚಿನ ಅನಾಹುತ ನಡೆಯಲು ಸಾಧ್ಯವಾಗುತ್ತಿರಲಿಲ್ಲವೇನೋ..? ಆದರೆ ಅದೇ ದಿನ MK ಫ್ಯಾಮಿಲಿಯ ಹುಡುಗ ರಾಝಿಂ (ಈಗಾಗಲೇ ಬಂಧಿತನಾದವ) ಮೇಲೆ ಮುನೀರ್‌ ಪುತ್ರ ಹಾಗೂ ಒಂದಿಷ್ಟು ಜನ ಹಲ್ಲೆ ನಡೆಸಿದ್ದರು ಅನ್ನೋ ಆರೋಪ ಕೇಳಿ ಬಂದಿದೆ. ಆ ಸಮಯದಲ್ಲಿ ನಡೆದ ಹಲ್ಲೆಯಲ್ಲಿ ಅಬ್ದುಲ್ ಲತೀಫ್‌ ಕೂಡಾ ಭಾಗಿಯಾಗಿದ್ದ ಅನ್ನೋದಾಗಿ ರಾಝಿಂ ಸಹೋದರ ರಿಝ್ವಾನ್‌ ಫೋನ್‌ ಸಂಭಾಷಣೆಯಲ್ಲಿ ಆಡಿರುವ ಮಾತುಗಳು ವೈರಲ್‌ ಆಗಿವೆ. ಅದೇ ಕಾರಣಕ್ಕೆ ರಾಝಿಂ ಸಹೋದರರು ಗಲ್ಫ್‌ ರಾಷ್ಟ್ರದಲ್ಲಿ ಕೂತು ಧಮ್ಕಿ ಹಾಕಿದ್ದಾರೆ ಎನ್ನಲಾಗುತ್ತಿದೆ. ಇದೇ ವೈಷಮ್ಯ ಮುಂದುವರೆದು ಲತೀಫ್‌ ಟಾರ್ಗೆಟ್‌ ಆಗಿದ್ದಾರೆ. ಮುನೀರ್‌ ತನ್ನ ಅಡ್ಡ ಕಸುಬಿಗೆ ಅಳಿಯ ಲತೀಫ್‌ ಅವರನ್ನ ದುರ್ಬಳಕೆ ಮಾಡಿಕೊಂಡಿದ್ದರೇ ಅನ್ನೋದು ಗೊತ್ತಾಗಿಲ್ಲ.. ಆದರೆ ಲತೀಫ್‌ ಆ ನಂತರ ಹಲವು ಧಮ್ಕಿ ಕರೆಗಳನ್ನ ಸ್ವೀಕರಿಸಿದ್ದು ನಿಜ. ಆದ್ದರಿಂದ ಇಲ್ಲಿ ಲತೀಫ್‌ ಅವರೇ ಟಾರ್ಗೆಟ್‌ ಆಗಿದ್ರೂ ಅನ್ನೋದು ಕೂಡಾ ಅಷ್ಟೇ ಸತ್ಯ. ಆದರೆ ಇದು ತನ್ನ ಸಾವಿಗೆ ಕಾರಣವಾಗುತ್ತೆ ಅಂತ ಲತೀಫ್‌ ಅಂದ್ಕೊಂಡಿರಲು ಛಾನ್ಸೇ ಇಲ್ಲ..

ಜಾಲತಾಣ ತುಂಬಾ ಆಕ್ರೋಶ:

ಇಷ್ಟಾಗುತ್ತಲೇ ಕರಾವಳಿಯ ಪ್ರಜ್ಞಾವಂತ ಮುಸ್ಲಿಮರ ತಾಳ್ಮೆಯ ಕಟ್ಟೆಯೊಡೆದಿದೆ. ಟ್ವಿಟ್ಟರ್‌ ನಲ್ಲಿ #JusticeForAbdulLathif ಅನ್ನೋ ಹ್ಯಾಷ್‌ ಟ್ಯಾಗ್‌ ಮೂಲಕ ತಮ್ಮ ಆಕ್ರೋಶವನ್ನ ವ್ಯಕ್ತಪಡಿಸಿದ್ದಾರೆ. ಕೊಲೆ ಹಿಂದಿರುವ ಶಕ್ತಿಗಳನ್ನೂ ಹೊರಗೆಡುವಂತೆ ಸಿಎಂ, ಗೃಹ ಸಚಿವರ ಸಹಿತ ಪೊಲೀಸ್‌ ಅಧಿಕಾರಿಗಳಿಗೆ ಒತ್ತಾಯಿಸಿದ್ದಾರೆ. ಗಾಂಜಾ ವಿರುದ್ಧವೂ ಧಾರ್ಮಿಕ ಗುರುಗಳು, ನಾಯಕರು, ಸಾಮಾಜಿಕ ಕಾರ್ಯಕರ್ತರು ಹೋರಾಟ ನಡೆಸುವ ಸೂಚನೆ ನೀಡಿದ್ದಾರೆ. ಇಷ್ಟೆಲ್ಲಕ್ಕೂ ಕಾರಣವಾಗಿದ್ದೇ ಅಬ್ದುಲ್‌ ಲತೀಫ್‌ ಅವರಲ್ಲಿ ಒಳ್ಳೆಯತನ ಅನ್ನೋದನ್ನ ಬಿಡಿಸಿ ಹೇಳಬೇಕಿಲ್ಲ.

ಸ್ವಲ್ಪ ಯಾಮಾರಿದ್ರೂ ಜೈಲಲ್ಲೇ ʼರಿವೇಂಜ್ʼ…!!

ಅಬ್ದುಲ್‌ ಲತೀಫ್‌ ಅವರೇನೋ ಕೊಲೆಗಡುಕರ ಏಟಿಗೆ ಬಲಿಯಾಗಿದ್ದಾರೆ. ಆದರೆ ಅವರನ್ನ ಕೊಂದ ಆರೋಪಿಗಳ ವಿರುದ್ಧ ಆಕ್ರೋಶ ಭುಗಿಲೆದ್ದಿದೆ. ಇದರಿಂದಾಗಿ ಪೊಲೀಸರು ಸ್ವಲ್ಪ ಎಚ್ಚರ ತಪ್ಪಿದರೂ ಜೈಲಲ್ಲೇ ರಿವೇಂಜ್‌ ನಡೆದು ಹೋಗುವ ಸಾಧ್ಯತೆ ಬಗ್ಗೆ ಮುಲ್ಕಿ ತುಂಬೆಲ್ಲಾ ಹರಿದಾಡುತ್ತಿದೆ. ಆದರೆ ಒಂದಂತೂ ಸತ್ಯ ಅಮಾಯಕ ಲತೀಫ್‌ ಹತ್ಯೆ ಆಕ್ರೋಶವನ್ನ ಮಡುಗಟ್ಟುವಂತೆ ಮಾಡಿದೆ. ಮುನೀರ್‌ ಕುಟುಂಬಕ್ಕಂತೂ ಬಹುದೊಡ್ಡ ನಷ್ಟವೇ ಸರಿ. ತನ್ನ ಮಗಳನ್ನೇ ವಿಧವೆಯಾಗಿ ನೋಡುವ ದುರ್ದಿನ ಬಂದಿರೋದನ್ನ ಯಾರೂ ಸಹಿಸಿ ಸುಮ್ಮನಿರಲು ಸಾಧ್ಯವೇ ಇಲ್ಲ. ಸೋ, ಇದು ಎರಡು ಕುಟುಂಬಗಳ ನಡುವಿನ ಕಲಹಕ್ಕೆ ನಾಂದಿ ಹಾಡುತ್ತಾ ಅನ್ನೋ ಆತಂಕ ಇದೀಗ ಕಾರ್ನಾಡ್‌ ದರ್ಗಾ ರಸ್ತೆಯ ಮಂದಿಯಲ್ಲಿ ಮಡುಗಟ್ಟಿದೆ.

ಒಟ್ಟಿನಲ್ಲಿ ಪೊಲೀಸರ ವೈಫಲ್ಯ, ಗಾಂಜಾ ಮಸಲತ್ತು, ಕುಟುಂಬಗಳ ನಡುವಿನ ಬೀದಿ ಜಗಳ ಇವುಗಳೆಲ್ಲವೂ ಅಮಾಯಕ ಅಬ್ದುಲ್‌ ಲತೀಫ್‌ ಪ್ರಾಣವನ್ನೇ ಬಲಿ ಪಡೆದಿದೆ. ಇನ್ನಾದರೂ ಮುಲ್ಕಿ ಪೊಲೀಸರು ಎಚ್ಚೆತ್ತುಕೊಳ್ಳದಿದ್ದರೆ ಈ ಗಾಂಜಾ ಮಸಲತ್ತಿಗೆ ಇನ್ನಷ್ಟು ಬಲಿಯಾದೀತು. ಅಮಾಯಕನ ಹತ್ಯೆಯಂತೂ ನಡದೇ ಬಿಟ್ಟಿದೆ.. ಮುಂದೆ ಇನ್ನೊಬ್ಬ ಅಮಾಯಕನ ಹತ್ಯೆಗೆ ಅದು ಕಾರಣವಾಗಬಾರದಷ್ಟೇ..