ಅಪ್ಪೆ ಮಂತ್ರದೇವತೆ ತುಳುನಾಡುಡು ಬಲತ ಉಂಗುಷ್ಟೊನು ಊರ್ದಿನಿ ಆಟಿ 13 ಪೋಪಿನ ದಿನತಾನಿ

ಇನಿ ಆಟಿ 13 ಪೋಪಿನ‌ ದಿನ… ತುಲುವೆರೆನ ಉಡಲ್ಡ್ ನೆಲೆಯಾದ್ ಬರ್ಪಿ ಕಷ್ಟಲೆಗ್ ಮಾರಿಯಾದ್ ಸುಖ-ನೆಮ್ಮದಿನ್ ಕೊರ್ಪಿನ ಕಾರ್ನಿಕೊದ ಸತ್ಯ,  ಧರ್ಮಗ್ ಧರ್ಮಜಾವತೆ, ಸತ್ಯೊಗ್  ಸತ್ಯ ಜಾವತೆ, ಮಂತ್ರಗ್ ಮಂತ್ರ ಜಾವತೆ ಪಂದ್ ಪೊಲಬು ಪುಗರ್ತೆ ಪಡೆಯಿನ ಅಪ್ಪೆ ಮಂತ್ರ ಜಾವತೆನ್ 9 ತುಂಬೆತ ಪೂ, ಬಚ್ಚಿರೆ, ಬಜ್ಜಾಯಿ, ಮುಗಡುಲ್ಲ ತಾರಾಯಿಡ್ ಪಿಂಗಾರದ ಪಾಲೆ, ಗಂಧದ ಗುಲಿಗೆದೊಟ್ಟಿಗೆ ಸೂಂತ್ಲಾಡಿ ಬರ್ಕೆದ ಕಾಂತು ಬೈದೈಗ್ ಬೊಕ್ಕ ಪದ್ದುಂಜಿ ಬೈದೈಗ್, ಕುಂಟಾಲ ಜಂತರ್ಲು ಬಂಗಾರದ ಕೊರಲಾದ್ ಕೈಯೇರ್ದ್ ಕೊರ್ನಂಚಿನ ಮಾಮಲ್ಲ ದಿನೊ……

ಕಟ್ಟೆಮಾರ್ ಜನನೊಡು ಇರುವೈಲು ಸೂಂತಲಾಡಿ ಬರ್ಕೆದ ಗಂಗು ಬೈದಿತಿನ ಮಗೆ ಕಾಂತು ಬೈದೈ ಬೊಕ್ಕ ಪದ್ದುಂಜಿ ಬೈದೈ, ಊರುಡ್ ಆಪಿನ ಕಲ್ವೇರ ಕಾಟ ತಪ್ಪಾಯೇರ ಬೋಡಾದ್, ತೆನ್ಕಾಯಿದ ರಾಜ್ಯೊಗ್ ಪೋದ್ ಕುಂಟಾಲ ಜಂರ್ತಿಲೆನ ಇಲ್ಲದ ದೇವೇರ್ ಗುಬ್ಬಿ ದೇವೆರೆನ ಬಲಭಾಗೊಡ್ ನೆಲೆಯಾಯಿನ ಶಕ್ತಿ ಕೊರ್ಲೆ ಪಂದ್ ಕೇನುವೆರ್. ಆ ಪೊರ್ತುಡ್ ಕುಂಟಾಲ ಜಂರ್ತಿಲು ನಿಕುಲು ಕೇಂಡಿನ ಬೂತೊನು ನಿಕುಲೆನ ಊರುಗ್ ಪೋದ್ ಪಾಲಿಪೆರ ಭಂಗ ಆವು. ಆ ಶಕ್ತಿದ ಕಲೆ ಕಾರ್ಣಿಕ ಮಾಮಲ್ಲ. ನಿಕುಲು ದೇಶ ಸುತ್ತೊಡ್, ಭಾಷೆ ಕಲ್ಪೊಡ್ ಮಲೆಯಾಲಿ ಮಂತ್ರೋಡ್ ಅಲೆನ ಸಿದ್ದಿ ಮಲ್ತುದು, ಭಕ್ತಿಡ್ ಅಲೆನ್ ಒಲಿತ್ದ್ ಕೊನೆಲೇಂದ್ ಪನ್ಪೆರ್. 

ಆರ್ ಪಂಡಿಲೆಕನೆ ಕಾಂತು ಬೈದೈ ಬೊಕ್ಕ ಪದ್ದುಂಜಿ ಬೈದೈ ದೇಸ ತಿರ್ಗದ್ ಭಾಸೆ ಕಲ್ತುದು ಆ ಶಕ್ತಿನ್ ಕೊನೆಯೇರ ಕುಂಟಾಲ ಜಂರ್ತಿಲೆನ ಚಾವಡಿಡ್ ಸೆರಂಗ್ ಒಡ್ಡುದ್ ಉಂತುವೆರ್. 

ಆಟಿ ತಿಂಗೊಲುದ ಪದಿಮೂಜಿ ಬುದಾರ ದಿನೊತಾನಿ ಒಂಜಿ ಬೊಲ್ದು ಬೈರಾಸ್ಡ್ 9 ತುಂಬೆದ ಪೂ, ಬಚ್ಚಿರೆ ಬಜ್ಜಾಯಿ ಮುಗುಡಲ್ಲ ತಾರಾಯಿಡ್ ಪಿಂಗಾರದ ಪಾಲೆ ಗಂಧದ ಗುಲಿಗೆದೊಟ್ಟಿಗೆ ಕುಂಟಾಲ ಜಂತ್ರಿಲು ಆ ಶಕ್ತಿನ್ ಕಾಂತು ಬೈದೈ ಬೊಕ್ಕ ಪದ್ದುಂಜಿ ಬೈದೈನ ಕೈಕ್ ಕೊರ್ಪೆರ್. ತೆನ್ಕಾಯಿ ರಾಜ್ಯೊದ ಮಾಮಲ್ಲ ಶಕ್ತಿ ಅಪ್ಪೆ ಮಂತ್ರ ಜಾವತೆ ಇರುವೈಲುದ ಮಣ್ಣುಗು ಬಲತ್ತ ಉಂಗುಷ್ಟ ದೀತ್ ಪಿದಾಡಿನ ಪುಣ್ಯೊದ ದಿನ ಆಟಿ 13.

ಕಾಂತು ಬೈದೈನ ಬೆರಿ ಪತ್ತುದ್, ಪೆತ್ತದ ಪಿರಾವುಡ್ ಕಂಜಿ ಬತ್ತಿಲೆಕ, ಪೆರೆಡೆದ ಪಿರಾವುಡ್ ಕಿನ್ನಿಲು ಬತ್ತಿಲೆಕ, ಸೂಜಿದ ಪಿರಾವುಡ್ ನೂಲು ಬತ್ತಿಲೆಕ ತೆನ್ಕಾಯಿ ರಾಜ್ಯೊರ್ದ್ ಕಟ್ಟೆಮಾರ್ ಅರಮನೆದ ಸೂಂತ್ಲಾಡಿ ಬರ್ಕೆಗ್ ಬತ್ತಿನ ಮಾಮಲ್ಲ ಶಕ್ತಿ ಅಪ್ಪೆ ಮಂತ್ರಜಾವತೆ. ಸೂಂತ್ಲಾಡಿ ಬರ್ಕೆಗ್ ಬಲತ್ತ ಕಾರ್ ದೀನ ಅಪ್ಪೆಗ್ ಸಾಣ ಕಟ್ಟೆಯೆರ್, ಪೆಲತ್ತ ಮಣೆಮಂಚವು, ನಾಗಬೆತ್ತ ಒಪ್ಪಿಸಾತ್ ದಿನಾ ಕೇಪುಲ, ಪೂ-ನೀರ್ ದೀದ್ ಕೈ ಮುಗಿಯೊಂದ್ ಬತ್ತೆರ್.

ಇನಿದಾತ್ ದಿನ ಊರ್ ಒರ್ಮೆಲ ನಂಬಿಂಚಿ ಕುಟುಂಬೊಲೆಗ್ ಇಂಬುನ್ ಕೊರುದ್, ಬರ್ಪಿ ಮಾರಿಗ್ ಬೇಲಿಯಾದ್ ಉಂತುದ್ ನಮನ್ ಕಾಪುನ ಅಪ್ಪೆ ಮಂತ್ರ ಜಾವತೆನ ವಿಸೇಸತ ದಿನೋ ಆಟಿ 13 (ಪದಿಮೂಜಿ).

ಡಾ.ರವೀಶ್ ಪರವ ಪಡುಮಲೆ
ದೈವ ನರ್ತಕರ್/ಸಿವಿಲ್ ಇಂಜಿನಿಯರ್