ಅಜ್ಜ ಮತ್ತು ಒಂಟಿ ಬದುಕ ಸಂಭ್ರಮ…

ಅವಳು ಪ್ರತಿದಿನ ಹೇಳುತ್ತಿದ್ದದ್ದು ಒಂದೇ ಮಾತು… ನಾಲ್ಕು ಗೋಡೆಯ ಒಳಗೆ work from home ಬದುಕಾಗಿಬಿಟ್ಟಿದೆ. ಕೆಲಸದ ಅವಧಿಯಲ್ಲಿ ಲ್ಯಾಪ್ಟಾಪ್, ನಂತರ ಮೊಬೈಲ್, ರಾತ್ರಿಯಾದರೆ ಎಲ್ಲ ಹುಡುಗೀರ ಅಚ್ಚುಮೆಚ್ಚಿನ ಧಾರಾವಾಹಿ ರಾಧಾ ಕೃಷ್ಣ.. ಇಷ್ಟರಲ್ಲೇ ದಿನ ಕಳೆದು ಹೋಗುತ್ತದೆ ಎಂದು.

ಅಂದು ಒಂದು ದಿನ ಹೊರಟಳು ನೋಡಿ ಶಾಪಿಂಗ್ ಮಾಡಲೆಂದು. ದಾರಿಯಲ್ಲಿ ಸಿಕ್ಕ ಸಣ್ಣ ಕ್ಯಾಂಟೀನ್ ಒಳಗೆ ಕಾಲಿಡುತ್ತಾ ಮುದಿ ವಯಸ್ಸಿನ ಅಜ್ಜನನ್ನು ಕಂಡು ಭಾವುಕಳಾದಳು ಅಕ್ಕ. ಗ್ರಾಹಕರು ಬಂದು ಕುಡಿದು ಹೋದ ಚಹಾದ ಲೋಟ ತೊಳೆಯುವುದು ಅವರ ನಿತ್ಯ ಕಾಯಕವಂತೆ. ಮನೆಯಲ್ಲಿ ಮೊಮ್ಮಕ್ಕಳ ಜೊತೆ ಆಟವಾಡುತ್ತಾ ನೆಮ್ಮದಿಯಿಂದ ವಿರಾಮ ಬದುಕ ಅನುಭವಿಸಬೇಕಿದ್ದ ಅಜ್ಜ ಇಂತಹ ಕೆಲಸ ಮಾಡುತ್ತಿದ್ದಾರೆ ಎಂದರೆ ಅದೆಂತಹ ಕಷ್ಟವಿರಬೇಕು ಅಲ್ಲವೇ?

ಕಷ್ಟದಿಂದ ಮೇಲೆ ಬಂದವರಿಗೆ ಕಷ್ಟದ ಬದುಕು ಅರ್ಥವಾಗುತ್ತೆ ಅಂತಾರೆ ಹಿರಿಯರು. ಭಾವನಾತ್ಮಕವಾಗಿ ಸಹಾಯ ಮಾಡಬೇಕೆನ್ನುವ ಒಳ್ಳೆಯ ಮನಸ್ಸಿರುವವರಿಗೆ ಮಾತ್ರ ಪ್ರತಿಯೊಬ್ಬರ ಕಣ್ಣಲ್ಲಿ ಬದುಕಿನ ಬೇಗುದಿ ಚೆನ್ನಾಗಿ ಅರ್ಥವಾಗುತ್ತದೆ. ಹಾಗೆ ನಮ್ಮ ಈ ಹುಡುಗಿಯೂ ಮೊದಲಿನಿಂದಲೂ ಹಿರಿಯ ಪ್ರಾಯದವರು ಕಂಡರೆ ಗೌರವದಿಂದ ಕಾಣುವವಳು. ಅಲ್ಲೇ ಚಹಾ ಕುಡಿದು 100 ರೂಪಾಯಿ ಕೈಗಿತ್ತು “ಅಜ್ಜ ಇದು ನಿಮಗೆ ತೆಗೆದುಕೊಳ್ಳಿ” ಎಂದಾಗ ಆ ಮುಖದಲ್ಲಿ ಮೂಡಿದ ಹೊಸ ಆನಂದಕ್ಕೆ ಮಿತಿಯೇ ಇರಲಿಲ್ಲವಂತೆ.

ಹೀಗೆ ಆವಾಗಾವಾಗ ಅಜ್ಜನಿಗೆ ಕೈಲಾದಷ್ಟು ಸಹಾಯ ಮಾಡಲು ಹಾರ್ಲಿಕ್ಸ್, ಕಾಫಿ ಏನಾದರೂ ಒಂದು ಕುಡಿಯುವ ನೆಪ ದಲ್ಲಿ ಕ್ಯಾಂಟೀನ್ ಆಪ್ತವಾಗಿಬಿಟ್ಟಿತು. ಅಂದು ಗಣೇಶ ಚತುರ್ಥಿ ಹಬ್ಬ. ಅಜ್ಜನನ್ನು ನೋಡಲು ಅಂದು ಕೂಡ ಈಕೆ ಅಲ್ಲಿ ಹಾಜರ್. ಅಂದು ಕೂಡ ಎಂದಿನಂತೆ ಹಣವನ್ನು ಕೈಯಲ್ಲಿ ಇತ್ತಾಗ ಆ ಅಜ್ಜ ತನಗೆ ಈ ಮೊದಲು ಸಹಾಯ ಮಾಡಿದನ್ನು ನೆನಪಿಸುತ್ತಾ ನಿನ್ನ ಹೆಸರಲ್ಲಿ ಆ ಹಣವನ್ನು ಮನೆಯವರಿಗೆ ಕೊಟ್ಟೆ ತಾಯೇ. ನೂರು ಕಾಲ ಹೀಗೆ ಸುಖವಾಗಿ ಬಾಳಮ್ಮ ಎಂಬ ಮಾತಲ್ಲಿ ಆಶೀರ್ವಾದದ ಶುಭ ನುಡಿ ಮನಸ್ಸಿಗೆ ಹರ್ಷ ನೀಡಿದ್ದು ಮಾತ್ರ ಸುಳ್ಳಲ್ಲ ಎನ್ನುತ್ತಾಳೆ ಅದೇ ನನ್ನ ಒಲವಿನ ಅಕ್ಕ. ಕೈಗೆ 10 ರೂಪಾಯಿ ಸಿಕ್ಕಿದರೂ ಹೇಗಾದರೂ ಹಣ ಒಟ್ಟುಗೂಡಿಸಿ ಕುಡಿತಕ್ಕೆ ಬೀಳುವ ಅದೆಷ್ಟೋ ಕುಡುಕರಿಗೆ ಈ ಅಜ್ಜ ಮಾದರಿ ಎನಿಸುವುದಿಲ್ಲವೇ?

ಅಷ್ಟೇ ಏಕೆ ದೇವರ ಹುಂಡಿಗೆ ಚಿಲ್ಲರೆ ಹುಡುಕುವ ಜಿಪುಣ ಬುದ್ಧಿಯ ಜನರಿಗೆ ಈ ಕುವರಿ ಪ್ರೇರಣೆಯಾಗುತ್ತಾಳೆ ಅಲ್ಲವೇ. ಮಾಡಿದ ಸಣ್ಣ ಸಹಾಯವನ್ನು ಆನಂದಿಸುವ ಆ ಮನಸ್ಸುಗಳ ಕಣ್ಣಲ್ಲಿ ಮೂಡುವ ಸಡಗರಕ್ಕೆ ಬೆಲೆ ಕಟ್ಟಲು ಸಾಧ್ಯವೇ. ಅದ ನೋಡಿದರೆ ಆತ್ಮತೃಪ್ತಿ ಮನೆ ಮಾಡುತ್ತದೆ. ಒಂಟಿ ಬದುಕು ಸಂಭ್ರಮಿಸುತ್ತದೆ. ಜಗತ್ತಲ್ಲಿ ಎಲ್ಲರಿಗಿಂತ ತಾನೇ ಸುಖಜೀವಿ ಎಂದು ಮನ ಹೇಳುವುದು ಇಂತಹ ಸಣ್ಣ ವಿಷಯದಲ್ಲೂ ಖುಷಿಯ ಕಂಡು ಬದುಕಿದ್ದವನಿಗೆ ಮಾತ್ರ. ಏನಂತೀರಾ…?

ಅರ್ಪಿತಾ ಕುಂದರ್
ಎಂಸಿಜೆ
ವಿವೇಕಾನಂದ ಕಾಲೇಜು, ಪುತ್ತೂರು