ಸಿ - ಸ್ಪೆಶಲ್

ಗಟ್ಟಿಗಳು ನನ್ನ‌ ಅಜ್ಜಿ…!

newscordinator newscordinatorBy Updated:68 Comments2 Mins Read

ಎಲ್ಲಾ ಮಕ್ಕಳಿಗೂ ಶಾಲಾ ರಜೆಯಲ್ಲಿ ಅಜ್ಜಿ ಮನೆಗೆ ಹೋಗೋದು ಸಂಭ್ರಮವೇ ಸರಿ. ಆದರೆ ನನ್ನ ಅಜ್ಜಿ ಮನೆ ನನ್ನ ಮನೆಯ ಪಕ್ಕದಲ್ಲೇ ಇದ್ದುದರಿಂದ ನನಗೆ ಈ ಸಂಭ್ರಮ ನಿತ್ಯ ದೊರೆಯುತ್ತಿತ್ತು. ಮನೆಯಲ್ಲಿ ಅಮ್ಮ ಹೊಡೆದಾಗ ನಮ್ಮ ಕೂಗು ಜೋರಾಗೆ ಇರುತ್ತಿತ್ತು. ಕಾರಣ, ನೋವಿನಿಂದಲ್ಲ ಅಜ್ಜಿ ಬಂದು ಬಿಡಿಸಲಿ ಎಂಬ ಕಾರಣಕ್ಕೆ! ನನಗಂತೂ ನನ್ನಜ್ಜಿ ಪಕ್ಕದ ಮನೆಯವರ ಟಿವಿಯಲ್ಲಿ ಬರುತ್ತಿದ್ದ ಸಿನೆಮಾ ಹೀರೋಗಳಿಗಿಂತ ಬಲಶಾಲಿಯಾಗಿ ಕಾಣುತ್ತಿದ್ದಳು.

ಬಾಲ್ಯದಲ್ಲಿ ಅಜ್ಜಿ ಹೇಳುತ್ತಿದ್ದ ಕಥೆಗಳಂತೂ ಇಂದಿಗೂ ಜೀವಂತವಾಗಿರುವಂತಿವೆ. ದೊಡ್ಡ ಊರಲೊಬ್ಬ ರಾಜ.. ಆತನ ಮುದ್ದಿನ ಪತ್ನಿ, ಬೆಟ್ಟದ ಮೇಲೊಂದು ಸಿಂಹ.. ಹೀಗೆ ಹಲವಾರು ಕಥೆಗಳಿಗೆ ಜೀವ ತುಂಬುತ್ತಾ ಕೆಲವೊಂದು ಕಥೆಗಳಲ್ಲಿ ತಾನೇ ಪಾತ್ರಧಾರಿಯೂ ಆಗಿದ್ದಳು. ಚಿಕ್ಕ ವಯಸ್ಸಿನಿಂದಲೂ ಬಡತನದ ಬೇಗೆಯಲ್ಲೇ ಬೆಳೆದ ಆಕೆಗೆ ಯಾವುದೇ ಪರಿಸ್ಥಿತಿ ಬಂದರೂ ನಿರ್ಭೀತಿಯಿಂದ ಎದುರಿಸುವ ಕಲೆ ಸಹಜವಾಗೇ ಬಂದಿತ್ತು. ಕುಳಿತು ತಿನ್ನುವುದು ಆರೋಗ್ಯಕ್ಕೆ ಹಾಳು ಎಂಬ ಸಿದ್ದಾಂತವನ್ನು ಬಲವಾಗಿ ನಂಬಿದ್ದ ಆಕೆ ಯಾವ ಗಂಡಸಿಗೂ ಕಡಿಮೆ ಇಲ್ಲದಂತೆ ದುಡಿಯುತ್ತಿದ್ದಳು.

ನನ್ನ ಅಮ್ಮ ಯಾವಾಗಲೂ ಹೇಳುತ್ತಿದ್ದ ಘಟನೆ ನನ್ನನ್ನು ಇಂದಿಗೂ ಕಾಡುತ್ತದೆ. ಅದೇನೆಂದರೆ ನನ್ನ ಅಜ್ಜಿಯ ಯೌವನದಲ್ಲಿ ತಾನು ಕೆಲಸ ಮಾಡುತ್ತಿದ್ದ ತೋಟಕ್ಕೆ ಫಾರೆಸ್ಟ್ ಆಫೀಸರ್ ಬಂದಾಗ ಅವರಿಗೆ ತಾನೇ ಸೀರೆಯನ್ನು ಕಚ್ಚೆ ಹಾಕಿ ತಾನೆ ಎಳನೀರು ತೆಗೆದು ತೋಟದ ಯಜಮಾನನೇ ಆಶ್ಚರ್ಯ ಪಡುವಂತೆ ಮಾಡಿದ್ದು ನನ್ನಜ್ಜಿಯ ದಿಟ್ಟತನಕ್ಕೆ ಒಂದು ನಿದರ್ಶನವಷ್ಟೆ.

ನನ್ನ ಊರಲ್ಲಿರುವ ಕಾಡು ದಾರಿಯ ಬಂಗಲೆ. ಮನೆಯವರೆಲ್ಲ ಬಾಂಬೆಯಲ್ಲಿಯೇ ತಮ್ಮ ಉದ್ಯಮ, ಮನೆ ನೋಡಿಕೊಂಡು ಅಲ್ಲೆ ಇದ್ದರು. ಆದರೆ ಊರಲ್ಲಿರುವ ಈ ಬಂಗಲೆಗೆ ನನ್ನಜ್ಜಿಯೇ ಸರ್ವಸ್ವ ಆಗಿದ್ದರು. ಒಂದು ದಿನ ಆ ಬಂಗಲೆಯ ಯಜಮಾನ ತೀರಿಕೊಂಡ ನಂತರ ಆ ಮನೆಯೊಡತಿ ಹೇಳಿದ ಮಾತು “ಆಕೆ ಕೆಲಸದವಳಾದರೇನು ಆಕೆ ಕೆಲಸದಲ್ಲಿರುವ ತನಕ ಆ ಮನೆ ಮಾರೋದಿಲ್ಲ..!”. ಈ ಮಾತುಗಳು ಆಕೆಯ ನಿಯತ್ತನ್ನು ತಿಳಿಸುತ್ತವೆ.

ಸತತ 12 ವರ್ಷಗಳ ಕೆಲಸದ ನಂತರ ಆಕೆ ಸ್ವಯಂ ನಿವೃತ್ತಿ ಪಡೆಯುತ್ತಾಳೆ. ವಯಸ್ಸು ದೇಹಕ್ಕಾಗಿರಬಹುದು, ಆದರೆ ಅವಳು ಇವತ್ತಿಗೂ ಸಿಕ್ಕ ಕೆಲಸಕ್ಕೆ ಹೋಗುತ್ತಾ ತಾನು ಗಟ್ಟಿಗಳು ಎಂಬುದನ್ನು ನಮಗೆಲ್ಲ ತೋರಿಸುತ್ತಿದ್ದಾಳೆ. ಅಲ್ಲದೆ ನಿವೃತ್ತಿ ಇಲ್ಲದ ಜೀವನದ ಖುಷಿ ಅನುಭವಿಸುತ್ತಿದ್ದಾಳೆ. ನನ್ನ ಅಜ್ಜಿ ನಿಜಕ್ಕೂ ಗಟ್ಟಿಗಳು.

ಸುರೇಶ್‌ ರಾಜ್‌
ಪ್ರಥಮ ಬಿಎ (ಪತ್ರಿಕೋದ್ಯಮ)
ವಿಶ್ವವಿದ್ಯಾನಿಲಯ ಕಾಲೇಜು, ಮಂಗಳೂರು

Share.

Related Posts

68 Comments

Leave A Reply