ಶಶಿಕಲಾ ನಟರಾಜನ್ ಆಸ್ಪತ್ರೆಯಿಂದ ಡಿಸ್ಚಾರ್ಜ್; ಅಭಿಮಾನಿಗಳಿಗೆ ಹಬ್ಬ

ಬೆಂಗಳೂರು: ನಾಲ್ಕು ವರ್ಷಗಳ ಸೆರೆವಾಸ ಮುಗಿಸಿ ಕೊರೊನಾ ಸೋಂಕಿನಿಂದಲೂ ಮುಕ್ತವಾಗಿರುವ ತಮಿಳುನಾಡಿನ ಎಐಎಡಿಎಂಕೆ ಚಿನ್ನಮ್ಮ ಶಶಿಕಲಾ ನಟರಾಜನ್ ಅವರು ಇಂದು ಆಸ್ಪತ್ರೆಯಿಂದ ಬಿಡುಗಡೆಯಾಗಿದ್ದಾರೆ. ಚಿನ್ನಮ್ಮ ಅವರ ಬಿಡುಗಡೆಯನ್ನು ಎಐಎಡಿಎಂಕೆಯ ಕಾರ್ಯಕರ್ತರು, ಅವರ ಅಭಿಮಾನಿಗಳು ಹಬ್ಬದ ಮಾದರಿಯಲ್ಲಿ ಜಮಾಯಿಸಿದ್ದರು.

ಇಂದು ಬೆಳಗ್ಗೆಯೇ ಆಸ್ಪತ್ರೆ ಬಳಿ ನೂರಾರು ಸಂಖ್ಯೆಯಲ್ಲಿ ಕಾರ್ಯಕರ್ತರು, ಅಭಿಮಾನಿಗಳು ಸಂಭ್ರಮಿಸಿದರು. ಚಿನ್ನಮ್ಮ ಅವರನ್ನು ಕರೆದುಕೊಂಡು ಹೋಗಲು ತಮಿಳುನಾಡಿನಿಂದಲೇ ಖಾಸಗಿ ಎಸ್ಕಾರ್ಟ್, ಐಷರಾಮಿ ಲ್ಯಾಂಡ್ ಕ್ರೂಸರ್ ಕಾರು ಸೇರಿದಂತೆ ಹತ್ತಾರು ವಾಹನಗಳು ಬಂದಿದ್ದವು.

ಆಸ್ಪತ್ರೆಯಿಂದ ಬಿಡುಗಡೆಯಾದ ಶಶಿಕಲಾ ಅವರಿಗೆ ಭದ್ರತೆ ನೀಡಲು ಸ್ಥಳೀಯ ಪೊಲೀಸರು 300ಕ್ಕೂ ಹೆಚ್ಚು ಸಿಬ್ಬಂದಿಯನ್ನು ನಿಯೋಜಿಸಿದ್ದರು.ಆಸ್ಪತ್ರೆಯಿಂದ ಸಿಟಿ ಮಾರ್ಕೆಟ್ ದಾಟಿ ಹೋಗುವವರೆಗೂ ಪೆÇಲೀಸರು ಚಿನ್ನಮ್ಮ ಅವರ ಕಾರಿನ ಹಿಂದೆಮುಂದೆ ಅಕ್ಷರಶಃ ಓಡಿಕೊಂಡು ಹೋಗಿ ರಕ್ಷಣೆ ನೀಡಬೇಕಾದ ಪರಿಸ್ಥಿತಿ ಎದುರಾಯಿತು.

ರಸ್ತೆಯ ಎರಡೂ ಬದಿಗಳಲ್ಲಿ ಶಶಿಕಲಾ ಅಭಿಮಾನಿಗಳು ಕೈಯಲ್ಲಿ ಫೋಟೋ ಹಿಡಿದುಕೊಂಡು ಸ್ವಾಗತಿಸಿದರಲ್ಲದೆ ಜೈಕಾರಗಳನ್ನು ಮೊಳಗಿಸಿದರು. ಆಸ್ಪತ್ರೆಯಿಂದ ಬಿಡುಗಡೆಗೊಂಡ ಬಳಿಕ ಕೆಲಕಾಲ ವಿಶ್ರಾಂತಿಗಾಗಿ ಕರ್ನಾಟಕದ ಗಡಿಭಾಗದ ತಮಿಳುನಾಡಿನ ರಹಸ್ಯ ಸ್ಥಳದಲ್ಲಿ ಶಶಿಕಲಾ ತಂಗಲಿದ್ದಾರೆ ಎಂದು ಹೇಳಲಾಗಿದೆ. ಮೂರು ದಿನಗಳ ವಿಶ್ರಾಂತಿ ಬಳಿಕ ಚೆನ್ನೈಗೆ ಮರಳಲಿದ್ದಾರೆ ಎಂಬ ಮಾಹಿತಿ ಇದೆ.

ತಮಿಳುನಾಡಿನ ಮುಖ್ಯಮಂತ್ರಿಯಾಗಿದ್ದ ದಿವಂಗತ ಜಯಲಲಿತ ಅವರ ಆಪ್ತ ಗೆಳತಿಯಾಗಿರುವ ಶಶಿಕಲಾ ಅವರು ಅಕ್ರಮ ಆಸ್ತಿ ಗಳಿಕೆ ಪ್ರಕರಣದಲ್ಲಿ ಅಪರಾ ಎಂದು ಘೋಷಣೆಯಾಗಿ 2017ರ ಫೆ.15ರಂದು ಬೆಂಗಳೂರಿನ ಪರಪ್ಪನ ಅಗ್ರಹಾರದ ಜೈಲು ಸೇರಿದ್ದರು.

ನಾಲ್ಕು ವರ್ಷಗಳ ಅವರ ಶಿಕ್ಷೆ 2021ರ ಜ.27ಕ್ಕೆ ಮುಕ್ತಾಯಗೊಂಡಿತ್ತು. ಅದರೆ ಅದೇ ವೇಳೆಗೆ ಶಶಿಕಲಾ ಅವರಿಗೆ ಕೊರೊನಾ ಸೋಂಕು ತಗುಲಿತ್ತು. ಅನಾರೋಗ್ಯದಿಂದ ಜ.20ರಂದು ಬೆಂಗಳೂರಿನ ಬೌರಿಂಗ್ ಆಸ್ಪತ್ರೆಗೆ ದಾಖಲಾದ ಶಶಿಕಲಾ ಅವರು ಕೋವಿಡ್ ದೃಢಪಟ್ಟ ಹಿನ್ನೆಲೆಯಲ್ಲಿ ವಿಕ್ಟೋರಿಯಾ ಆಸ್ಪತ್ರೆಗೆ ಸ್ಥಳಾಂತರಗೊಂಡಿದ್ದರು. 10 ದಿನಗಳ ಚಿಕಿತ್ಸಾ ಅವ ನಿನ್ನೆಗೆ ಮುಗಿದಿತ್ತು. ಕೊನೆಯ ಹಂತದ ಕೋವಿಡ್ ಪರೀಕ್ಷೆ ನಡೆಸಿದಾಗ ನೆಗೆಟಿವ್ ಬಂದ ಹಿನ್ನೆಲೆಯಲ್ಲಿ ಇಂದು ಬೆಳಗ್ಗೆ ಆಸ್ಪತ್ರೆಯಿಂದ ಅವರನ್ನು ಬಿಡುಗಡೆ ಮಾಡಲಾಗಿದೆ.

ಶಶಿಕಲಾ ಅವರನ್ನು ಕರೆದುಕೊಂಡು ಹೋಗಲು ಸುಮಾರು 250 ವಾಹನಗಳು ಬಂದಿವೆ ಎಂದು ಅಂದಾಜಿಸಲಾಗಿತ್ತು. ಆದರೆ ಸಂಚಾರ ದಟ್ಟಣೆಯ ಸಮಸ್ಯೆ ಕಾರಣಕ್ಕಾಗಿ ವಾಹನಗಳ ಸಂಖ್ಯೆಯನ್ನು ಕಡಿಮೆಗೊಳಿಸಲಾಗಿದೆ. ಆದರೂ ಕೂಡ ಅಭಿಮಾನಿಗಳು ಅದ್ಧೂರಿಯಾಗೇ ಚಿನ್ನಮ್ಮ ಅವರನ್ನು ಬರಮಾಡಿಕೊಂಡಿದ್ದಾರೆ. ವಿಧಾನಸಭೆ ಚುನಾವಣೆ ಎದುರಾಗಿರುವ ಈ ಸಂದರ್ಭದಲ್ಲಿ ಶಶಿಕಲಾ ನಟರಾಜನ್ ಅವರ ಬಿಡುಗಡೆ ರಾಜಕೀಯ ಸಂಚಲನಕ್ಕೆ ಕಾರಣವಾಗಿದೆ.